Konġura li setgħet tellfet ċelebrazzjoni
Charles B. Spiteri
L-istorja Ngliża jaf kellha differenzi kbar, u minflok ma r-Reġina ċċelebrat is-60 anniversarju tal-koronazzjoni tagħha f’Ġunju tal-2013, setgħet kienet qed tqatta’ ħajja totalment differenti.
Dan kollu minħabba konġura li faqqset segretament fil-palazz tagħha biex jippruvaw iwaqqfuha milli ssir reġina, fis-snin qabel il-mewt ta’ missierha, Ġorġ VI. Fil-qalba ta’ din il-konġura sensazzjonali kien hemm zijuha, dak li kien se jkun ir-Re Dwardu VIII, u li abdika fl-1936. Il-pjan kien wieħed sempliċi. Id-Duka ta’ Windsor, kif beda jissejjaħ meta abdika mit-tron, kellu jmur lura l-Ingilterra biex isir Re –bl-iskuża li n-neputija tiegħu (li kienet fl-għoxrinijiet tagħha) kienet ċkejkna wisq biex tirrenja. U ladarba jikseb it-tron mill-ġdid, kien ikun diffiċli li jerġgħu jwarrbuh minn postu.
Inħarsu lejn din il-konġura llum, jaf ma naqblux magħha – iżda setgħet ħadmet.
Għax tul it-tmiem tas-snin Erbgħin, meta l-pjan beda jifforma, fil-Palazz ta’ Buckingham kienet tirrenja paranojja sħiħa. In-nies għoljin ta’ madwar Ġorġ VI kienu qed iħarsu bl-ikrah lejn l-għaxqa tar-re – bintu l-kbira, il-Prinċipessa Eliżabetta, li kienet innamrat minn prinċep Grieg ta’ ftit importanza u mingħajr sold. Dan kien jismu Philip.
Agħar minn hekk kien is-suspett li z-ziju ta’ Philip, raġel ambizzjuż u influwenti għall-aħħar, li kien l-Earl Mountbatten, seta’ jkun ta’ theddida għar-renju u jkun il-qawwa ġdida fit-tron Ingliż.
Id-Dar ta’ Windsor ma kienet popolari xejn. Ir-Re, imfarrak minn snin ta’ gwerra, qatt ma ta kas ta’ saħħtu, u skont Winston Churchill, kien ‘miexi id f’id mal-mewt’.
Lord Moran, it-tabib ta’ Churchill innifsu, fl-1949 kien tal-fehma li: ‘Anki jekk ir-re jfiq, qajla jkun jista’ jgħix aktar minn sena’.
Ma’ mewtu kellha tieħu postu bintu Eliżabetta, xbejba ċkejkna, li tqieset bħala vulnerabbli għal Philip, li permezz tiegħu saret Mountbatten. Ħafna kienu tal-fehma wkoll, li hekk kif Eliżabetta tiżżewweġ lil Philip, il-prinċipessa ssir Reġina u ‘Dickie’ Mountbatten jippjana biex neputih jilħaq Re, jew jingħata t-titlu aktar prestiġjuż minn prinċep – bħala King Consort.
Iz-ziju ta’ Philip deher aktar milli ferħan għall-fatt li l-Familja Rjali Ingliża, magħrufa bħala d-Dar ta’ Windsor sa mill-1917, kellha tibda tissejjaħ id-Dar ta’ Mountabtten appena neputih jiżżewweġ lil Eliżabetta.
Kien hemm bosta li opponew għal dan u nies għolja mill-palazz, ħadmu favur id-Duka ta’ Windsor u ħajruh jerġa’ lura fl-Ingilterra biex ikun fil-quċċata tas-siġra.
Jidher li dan l-inkuraġġiment għoġob lid-Duka li beda jdur fuq il-Ministri u n-nies tal-Palazz u jwegħidhom xogħlijiet mill-aqwa. Hu u n-nies tal-konġura tiegħu riedu jwarrbu lil Eliżabetta, li wara kollox kellha d-dritt tiret it-tron mingħand missierha.
Iżda l-pjan tagħhom ma rnexxiex, għalkemm jidher li ma kien hemm ħadd kapaċi jwaqqaf lid-Duka ta’ Windsor kieku kellu jagħmel appell lill-pajjiż u dan jaċċetta li jaċċettah lura. Iżda minn dak kollu maħsub, fl-aħħar, id-Duka ma għamel xejn.
X’seta’ waqquf mill-konġura mħejjija għall-kisba tat-Tron? Tilef is-sabar? Jew laħaq ħabb New York, Palm Beach u l-Cote d’Azur?
Hi x’inhi r-raġuni, il-Prinċep għamel żjara qasira f’Londra – it-temp Ingliż ma għoġbux u reġa’ telaq. Kieku rnexxielu jikseb it-Tron hu, żgur li r-Reġina Eliżabetta II ma kinitx tiċċelebra s-60 anniversarju tal-Koronazzjoni tagħha fil-bidu ta’ Ġunju.
Reliġjon bil-passatur fir-ras!
Raġel li skont ma ntqal, dejjem jilbes passatur f’rasu għal raġunijiet reliġjużi, ngħata permess li b’dan il-passatur jidher fil-Karta tal-Identità uffiċjali. Lukas Novy, minn Brno fir-Repubblika Ċeka, jgħid li l-fidi tiegħu hi fl-għaġin u għalhekk, imur fejn imur, dejjem jilbes passatur fuq rasu bħala simbolu tar-reliġjon tiegħu.
L-uffiċjali tal-pajjiż qatgħuha li jekk jiċħdu t-talba ta’ Novy, jkunu qed imorru kontra d-drittijiet legali tal-pajjiż, għax dan jjiż jagħti libertajiet reliġjużi ugwali.
Pavel Zara, kelliem mis-City Hall f’Brno spjega li: ‘L-applikazzjoni taqbel mal-liġijiet tar-Repubblika Ċeka, fejn l-ilbies tar-ras għal raġunijiet reliġjużi jew mediċi huma permessi sakemm dawn ma jgħattux il-wiċċ. Novy jistqarr li hu membru tal-Knisja tal-Mostru li jtir tal-ispagetti, (Church of the Flying Spaghetti Monster) li twaqqfet fl-Istati Uniti. Il-membri jemmnu li dan il-mostru hu aljen inviżibbli magħmul mill-ispagetti u pulpetti tal-laħam, li ħoloq l-univers wara li siker.
Fl-2005, Bobby Henderson, ta’ 24 sena mill-Istat ta’ Oregon, u li hu gradwat fil-fiżika, kiteb ittra dwar il-Mostru li jtir tal-Ispagetti, bħala protesta kontra d-deċiżjoni tal-Bord Edukattiv fl-Istat ta’ Kansas, li ppermetta tagħlim intelliġenti bħala alternattiva għall-evoluzzjoni fl-iskejjel pubbliċi.
Il-pastafarjani jiċċelebraw kull nhar ta’ Ġimgħa bħala jum sagru.
Bniedem ieħor pastafarjan, Niko Alm rebaħ każ fl-Awstrija wara li l-uffiċjali oġġezzjonaw li jilbes il-passatur f’rasu għar-ritratt tal-liċenza tas-sewqan tiegħu.
Hu dam tliet snin biex rebaħ il-kawża.
Oqbra tal-massa f’Jaffa
Sitt oqbra tal-massa xehdu l-fdalijiet ta’ tużżani ta’ Palestinjani li nqatlu matul il-gwerra bejn l-Iżraeljani u l-Għarab fl-1948, meta twaqqaf l-istat Lhudi. Dawn l-oqbra nkixfu fid-distrett ta’ Jaffa, f’Tel Aviv. Uffiċjal fiċ-ċimiterju Musulman qal li s-sejba makabra nstabet meta ċediet l-art waqt xogħol ta’ rinnovar.
Fl-1948, Jaffa kienet belt Palestinjana, iżda kien hemm esodu mill-akbar parti tal-popolazzjoni Għarbija meta l-Palestinjani waqgħu taħt il-qilla tal-armata żagħżugħa Iżraeljana u l-milizji leminin Lhud.
Mahmoud Obeid, riċerkatur u storiku, apparti milli resident ta’ Jaffa, qal li sabu sitt oqbra tal-massa, li tnejn minnhom ħaffruhom huma stess. Huma stmaw li fl-oqbra kien hemm madwar 200 ġisem, b’numru addizzjonali ta’ oqbra li għadhom mhux magħrufa. Il-fdalijiet huma ta’ nies ta’ etajiet differenti, inklużi nisa, tfal u xjuħ, b’uħud minnhom b’sinjali ta’ vjolenza fuqhom.
Atar Zeinab, bidwi tal-lokal, ta’ 80 sena qal li bħala teenager, waqt l-aħħar xhur tal-ġlied fl-1948, hu għen jinġabru l-katavri tal-Għarab fin-naħa t’isfel ta’ Jaffa. Dawn ittieħdu għal difna ta’ malajr qrib iċ-ċimiterju.
Hu stqarr li l-periklu li jintlaqtu mill-bullets u bċejjeċ tal-grenadi kien tali li l-iġsma ntefgħu wieħed fuq l-ieħor fil-kripti tal-familji, fiċ-ċimiterju, kontra l-użanza Musulmana.
Fl-1950 Jaffa kienet inkorporata f’Tel Aviv, u ngħatat l-isem ta’ Tel Aviv-Jaffa. Illum fiha popolazzjoni mħallta ta’ Għarab u Lhud. Iżda fil-gwerra tal-1948, madwar 760,000 Palestinjani ħarbu jew iġġiegħlu jaħarbu minn djarhom.
Skavar fuq l-asterojdi
In-Nasa għadha kif ħabbret li fl-2016 se tibgħat missjoni ġdida biex tħejji l-ħidma għat-tħaffir tal-asterojdi – xogħol li jaf ikattar it-triljuni ta’ liri fl-ekonomija dinjija.
Il-vapur tal-ispazju OSIRIS-REX għandu jasal fuq l-asterojde Bennu fl-2018, bl-iskop li jiġbor kampjuni kosmiċi u jiġi lura fid-dinja. Ix-xjenzjati jittamaw li l-missjoni taċċellera t-teknoloġija li tippermetti lill-umani jeskavaw fl-asterojdi għal metalli prezzjużi. In-nuqqasijiet fis-sorsi tal-materji primi fid-dinja kkawżaw l-inflazzjoni globali, li skont l-esperti ħolqu tensjonijiet qawwijin bejn in-nazzjonijiet.
Ix-xjenzjati tan-NASA qed isostnu li l-ħażna qawwija fil-materji primi li jinsabu fl-asterojdi – bħall-ingredjenti għall-fuel u metalli prezzjużi bħal ħadid u platinu – kapaċi jissupplixxu lid-dinja b’ħażniet vitali tar-riżorsi naturali. L-asterojdi jvarjaw fil-qies, minn ftit jardi għal mijiet ta’ mili. Ix-xjenzjati jemmnu li anki asterojde ċkejkna daqs dar, jaf ikun fiha metalli li jiswew miljuni ta’ liri.
Wieħed mill-ostakli li hemm hu n-nuqqas ta’ esperjenza fil-lokalizzar u l-analizzar tar-riżorsi fl-asterojdi u kif jikseb il-materjal minnhom.
.
L-OSIRIS-Rex (Origins, Spectral Interpretation, Resource Identification, Security and Regolith Explorer) qed tittama li tikseb din l-esperjenza.
L-OSIRIS-Rex (Origins, Spectral Interpretation, Resource Identification, Security and Regolith Explorer) qed tittama li tikseb din l-esperjenza. Il-vapur spazjali hu mistenni li jkun varat f’Settembru ta’ tliet snin oħra. Jasal fuq l-asterojde Bennu f’Ottubru tal-2018 u jistudjaha fid-dettall qabel ma jirritorna b’kampjuni ta’ materjal minn fuq il-wiċċ tagħha.
Irkant ta’ karozzi Mercedes
Charles B. Spiteri
Min jaf jekk fl-irkant tal-karozzi tat-tip Mercedes, li se jsir f’ Battersea, ikunx bniedem wieħed li jixtrihom! Irid garaxx enormi fejn iqegħidhom!
Dawn il-karozzi li jlaħħqu għal 74 karozza tal-istess tip, kienu ta’ persuna waħda u mistennija jdaħħlu aktar minn €21,861,780 fl-iktar irkant ta’ valur li qatt sar f’Londra.
Din il-kollezzjoni ta’ karozzi Mercedes, hi magħmula minn flotta ta’ vetturi Ġermaniżi, li jkopru perijodu ta’ 100 sena sewqan. Hemm limousines, karozzi sportivi, convertibles u anki ambulanza. Huma nġabru u ngħaqdu mill-kollettur anonimu Ewropew, tul is-snin.
Fil-quċċata tal-bejgħ hemm żewġ Mercedes tal-1938, li huma 540K cabrios, li għandhom iġibu bejn €1,495,806 u €2,876,550 il-waħda.
Il-540K hi meqjusa bħala l-aktar karozza mfittxija fost il-karozzi Ġermaniżi għax tirrappreżenta l-qofol tal-inġinerija fil-karozzi ta’ qabel il-gwerra.
L-aktar karozza antika hi l-Mercedes tal-1905, tal-mudell Simplex, li kienet karozza lussuża, li tagħmel 68 mil fis-siegħa.
Hemm ukoll tliet 300SLs, li huma l-ikoni tal-kumpanija, kif ukoll Gullwing tal-1956, li għandha tqarreb il-€103,555. Mercedes oħra li għandha 81 sena hi t-370s, li mistennija tinbiegħ għal €1,380,744 waqt li Cabrio 500K tal-1936 għandha tinbiegħ għal €1,035,558. Magħhom hemm ukoll ambulanza antika tal-1952, li l-prezz mitlub għaliha se jkun ta’ bejn il-€57,531 u t-€80,543.
Finalment hemm ukoll replika, mibnija fis-sena 2000, tal-ewwel karozza tad-dinja – il-Benz Patent Motorwagen tal-1886 – li għandha tinbiegħ għal €63,284.
Jekk, kif inhu maħsub, tinġibed l-attenzjoni tad-dilettanti tal-karozzi Mercedes, din il-flotta ta’ 74 karozza għandu jkollha dħul li jaqbeż il-€21,861,780
Serq ta’ tfajla jwassal għal sejba enormi
Bħalissa qisu kulħadd jitkellem fuq xebbiet u nisa miżmumin kontra xewqathom, jew biex iservu ta’ skjavi jew għall-prostituzzjoni. Ftit xhur ilu, u sewwasew f’April li għadda, tifla adolexxenti kienet rappurtata nieqsa minn Los Angeles. Xahar wara nstabet fin-naħa ta’ fuq ta’ Kalifornja, wara li nħatfet u ntużat bħala skjava għas-sess f’għalqa tal-marijuana.
Għall-ewwel, id-dipartiment tal-Pulizija f’Los Angeles iddeskriva l-għajbien tat-tifla ta’ 15-il sena, bħala ħarba mid-dar. Imbagħad instab li kienet inħatfet minn Ryan Balletto ta’ 30 sena u sieħbu Patrick Pearsmain ta’ 25 sena, li ħaduha magħhom fl-għalqa tad-droga f’Lake County, Kalifornja.
Skont ir-rapport, meta t-tifla wriet li ma tafx taħsad il-marijuana, inqaflet għal ħinijiet twal f’kaxxa tal-għodda b’qies ta’ erba’ piedi bi tnejn.
Din il-kaxxa sarulha xi toqob fiha biex it-tifla tkun tista’ tieħu n-nifs. Toqba oħra saret fil-qiegħ tagħha, biex twaħħal pajp ħalli jekk ikollha bżonn tinqeda għall-ħtiġiet naturali, jgħaddi kollox minnu. Fil-kaxxa xeħtulha biss kutra. Il-kaxxa tal-għodda kienet sprejjata u fuqha kellha tpinġija ta’ ras skeletrali ta’ annimal u ta’ bniedem, bil-logo ‘kollettur tal-għadam’.
Meta nħelset, it-tifla ftakret f’żewġ okkażjonijiet meta nqaflet fil-kaxxa għal tlett ijiem.
Flimkien mal-kaxxa tal-għodda, il-pulizija sabu qafas tal-injam, fejn persuna tista’ tintrabat għas-sess, ingassa, u xugaman abjad bit-tbajja’ tad-demm.
Fid-29 ta’ April, il-pulizija ta’ Lake County marru d-dar ta’ Balletto, jistaqsu fuq it-tifla, peress li kellhom suspett li kien hu l-bniedem responsabbli għall-għajbien tagħha. L-għada, it-tifla ċemplet lill-pulizija biex tgħidilhom li kienet tinsab tajba. L-awtoritajiet irnexxielhom isibu mnejn ċemplitilhom u ż-żewġt irġiel kienu arrestati waqt li t-tifla ttieħdet f’kustodja protettiva.
It-tifla rrappurtat li ż-żewġt irġiel kellhom x’jaqsmu magħha sesswalment. Ma’ Pearmain aċċettat hi, u ma’ Balletto, għax qalet li riedet tgħinu joħroġ mill-problemi li kellu. Iżda l-pulizija nfurmawha li ladarba għadha taħt l-età ma setgħetx taċċetta li jkollha sess ma’ adult.
L-investigaturi jemmnu li hemm vittmi oħra u meta aktar tard għamlu rejd fid-dar ta’ Balletto sabu aktar minn 1,400 pjanta tad-droga; €3011 fi flus kontanti u l-akbar u l-aktar armi soffistikati li nqabdu riċentement. Mal-qabda, li ttieħdet mid-dar, kienet arrestata wkoll Christa McConnell ta’ 27 sena, li hi s-sieħba ta’ Balletto. Bejniethom huma għandhom ħamest itfal, bl-iżgħar tarbija ta’ seba’ xhur li kienet rieqda f’sodda doppja b’pistola kkargata żewġ piedi bogħod minnha.
Il-ħamest itfal ittieħdu f’kustodja tat-tfal. Mc Connell kienet akkużata li ħalliet lil uliedha fil-periklu u li kellha l-armi fil-pussess tagħha.
Arti ta’ Rquqija fis-Sushi
Charles B. Spiteri
Bi snin ta’ taħriġ meħtieġ biex issir itamae – kok tradizzjonali Ġappuniż – mhix ħaġa tal-iskantament li l-ikel ikun arti fil-Ġappun. Iżda koka kreattiva rnexxielha tmur aktar lil hinn, meta litteralment ħolqot artiġjanat bis-sushi.
Tama-chan, jew kif hi magħrufa bħala l-illustratriċi Takayo Chiyta – tifforma r-ross u l-ħaxix tal-baħar f’varjetà ta’ disinji, minn cartoons ta’ qtates u fjuri żgħar daqs gidma, għal kopji ta’ ritratti famużi bħall-Girl With A Pearl Earring ta’ Vermeer għal The Scream ta’ Edvard Munch.
Il-koka minn Tokjo tuża l-kuluri tal-ikel, soy sauce u l-green wasabi, biex tagħti l-kulur lir-ross, ħalli tagħmel il-kreazzjonijiet ‘makizushi’ jew sushi rrumblat.
Skont it-tradizzjoni, l-ħaxix tal-baħar, ir-ross u l-ingredjenti l-oħra – bħal ħut nej, ġinġer u ħaxix – jinfirxu fuq tapit tal-mejda, magħmul mill-bamboo, jiġu rrumblati u mqattgħin fi tmien partijiet. Iżda għal Tama-chan, qabel ma tqattagħhom tagħti l-kulur għad-disinn li tkun tixtieq. Dan ikun il-waqt li tant tistenna, biex tara li d-disinji tal-makizushi tagħha, joħorġulha tajbin, għax sa ma taqsam ir-romblu, ma tkunx taf eżatt kif se joħorġilha x-xogħol.
Hi tisħaq li fl-arti tagħha m’hemmx ċans li tirranġa, speċjalment l-espressjonijiet tal-uċuħ. L-ewwel qatgħa tar-romblu tkun dejjem mument speċjali għal Tama-chan.
Tant daħlet fil-ħidma tagħha, li sa ħolqot website bl-isem Sushi smile of Tama-chan. Fiha tiddeskrivi l-missjoni tagħha biex tinkuraġġixxi l-edukazzjoni u l-gost fl-ikel permezz ta’ dan l-ikel Ġappuniż.
Ġeneralment, il-koki Ġappuniżi tas-sushi jieħdu taħriġ ta’ 20 sena – għalkemm hemm korsijiet iqsar għal dawk li jaħdmu f’ristoranti esklussivi, barra l-Ġappun.
Mibjugħa l-karozza ta’ Mussolini
Charles B. Spiteri
Karozza li kienet disinjata minn Mussolini biex tegħleb lil dik magħmula fil-Ġermanja Nazista, għadha sal-lum ittella’ 165 mil fis-siegħa fuq it-top speed. Mussolini kien riedha ta’ lewn aħmar dagħmi, f’forma ta’ bullet, kif fil-fatt saret. Issa wara dawn is-snin kollha nbiegħet f’irkant għal kważi 7 miljun ewro – it-tieni l-aktar karozza fid-dinja li titqies bħala l-aktar għolja.
Mhi ekonomika xejn, iżda din l-Alfa Romeo 8C-35, li kienet tħalli lil kull karozza oħra warajha bħal dell, inħadmet fl-1935.
Sentejn qabel, fl-1933, Adolf Hitler kien ħareġ mill-fondi statali biex iffinanzja l-karozzi tat-tip Mercedes Benz u l-Audi, li tqiesu bħala mudelli li ma setgħu jkollhom l-ebda sfida.
Iżda ftit wara, u għall-Grand Prix Taljana, Mussolini kkummissjona lill-Alfa biex tinawgura l-8C-35, li qalbet kollox ta’ taħt fuq.
Wara tellieqa waħda, ir-rivali tal-Alfa bdew jirtogħdu wara l-isteering tagħhom. Is-sewwieqa tal-Alfa kienu jgħaddu mill-ħames post għall-ewwel wieħed f’ħin ta’ żewġ minuti.
Wara 80 sena, din il-karozza ta’ Mussolini, li għadha kif inbiegħet, għadha f’kundizzjoni bħal ġdida. Għal 40 sena tħalliet f’garaxx f’Buckinghamshire.
Minkejja r-restawr li sarilha, għad għandha l-fatturi oriġinali kollha, inkluż il-gear u l-mirja.
Hi kienet inxtrat mill-industrijalist sinjur Dennis Poore, li seta’ jsuqha kull fejn ried, tant li anki ħa sehem biha f’kompetizzjonijiet. Iżda fl-1955, daħħalha fir-remissa tad-dar tiegħu f’Taplow, fejn baqgħet mhix mimsusa sa ma miet fl-1987.
Minn dak iż-żmien sarilha r-restawr, iżda għadha ttella’ l-ħeffa oriġinali tagħha fis-sewqan.
Hi nxtrat waqt irkant li sar fl-14 ta’ Settembru, minn Goodwood Revival Sale qrib Chichester, għall-prezz ta’ €7,077,524.
Sebaq l-apparat għat-tqabbiż tal-għajnejn
Missier li tant irnexxielu jqabbeż għajnejh ’il barra, li qajjem sensazzjoni fuq il-YouTube, ma rnexxilux jitniżżel fir-rekords – għax il-ġurati ma kellhomx apparat adekwat biex ikejlu kemm ħariġhom. John Doyle, ta’ 30 sena, imlaqqam ‘Mr. Zoom’, malajr kiseb popolarità, meta sentejn ilu beda jqiegħed il-filmati tiegħu fuq l-internet.
Vidjow minnhom, mibgħut lil Daft Punk’s Get Lucky, kiseb 500,000 telespettatur fi ftit jiem u permezz tal-vidjow beda jkun mistieden biex juri t-talent tiegħu fuq it-televiżjoni Amerikan u Ġappuniż.
Iżda nhar it-Tnejn, 16 ta’ Settembru, hu ġie miċħud it-titlu għar-rekord tiegħu, għax il-ġurati li marru jżuruh f’Vincent Hotel f’Southport, ma kellhomx tagħmir kbir biżżejjed biex ikejlu kemm qabbeż għajnejh ’il barra. Huma setgħu jkejlu sa 12-il millimetru, iżda John irnexxielu jqabbiżhom aktar minn hekk. Minħabba dan, kienu mġegħlin jiċħdulu t-titlu. Xi nies preżenti qalu li għajnejn John ħarġu 14-il millimetru.
Iżda minkejja kulma ġara u għalkemm ommu Jane u martu Becci garrew għal dan il-fatt, hu qal li beħsiebu jkompli għaddej bil-wirjiet tiegħu. Żied li ma ħax gost li ma kisibx it-titlu dinji, iżda jinsab fiduċjuż li jekk fi ftit ġimgħat isir l-apparat meħtieġ għall-kalkulazzjoni, lest jerġa’ jipprova. Hu fiduċjuż li din id-darba jikseb ir-rekord dinji, ladarba jaf li qabeż sew il-qies tal-apparat eżistenti.
Veduta mill-isbaħ minn muntanja
Dan hu siġġu li jippermetti lix-xabbaturi joqogħdu bilqiegħda fuqu, jirrilassaw u jammiraw il-veduta ta’ madwarhom. Naturalment, għal dawk ix-xabbaturi li jkunu xxabbtu għal mijiet ta’ piedi u li jkunu kuraġġużi biex jafdaw ruħhom f’dan is-siġġu tal-ħabel. Dallin Smith, minn Provo f’Utah, għamel dan is-siġġu mill-ħbula li m’għadux juża meta jixxabbat.
Hekk kif tinżel ix-xemx, Dallin imur hu stess f’dan is-siġġu marbut sew mal-ġenb tal-muntanja u joqgħod iħares lejn il-veduta mill-isbaħ ta’ quddiemu.
Dallin, disinjatur industrijali sab il-post perfett u waħħal is-siġġu f’għoli ta’ 350 pied ’il fuq mill-art f’Rock Canyon.
Il-provi tas-siġġu saru minn Dallin innifsu u t-tfajla tiegħu Chelsea Katseanes, li hi wkoll xabbatura.