Description
Ħjiel mill-Istorja ta’ Malta
Il-ġrajja tal-għoġol tad-deheb hi marbuta mal-ġrajja tal-Lhud f’Malta. Dawn kienu waslu fi gżiritna wara l-ħerba ta’ Ġerusalemm u ġabu magħhom l-egħżeż ħwejjeġ li kellhom, fosthom l-għoġol tad-deheb li Aronne, ħu Mosè, kien għamlilhom biex jaduraw fid-deżert. Sas-sena 1241 kien għad hawn 33 familja. Minkejja li tħallew iżommu l-gvern tagħhom, li huma kienu jsejħu ‘alayma’, ma ridux joqogħdu għal xi liġijiet tas-sultan u fl-1494 tkeċċew minn Malta. Jingħad li qabel ma telqu ħbew l-għoġol tad-deheb ġo għalqa f’Għawdex. Bosta Għawdxin minn dakinhar bdew ifittxu dat-teżor prezzjuż. Darba ġriet ix-xniegħa li wieħed bidwi kien sabu ġol-għalqa tiegħu. Is-sultan sab min kien dan il-bidwi u tefgħu l-ħabs. Iżda l-għoġol baqa’ ma sabu qatt.
Leġġendi Maltin
