Description
Il-Konti Luigi De Gravina Jitlob Ġustizzja huwa l-ħames rumanz miktub minn idejn il-Professur George A. Said-Zammit.
Il-ġrajja tar-rumanz teħodna lura għall-ewwel nofs tas-seklu dsatax. Din tintiseġ fuq sensiela ta’ kuntrasti li mingħajr dubju ta’ spiss jagħtu kulur u enerġija lill-ħajja tagħna ta’ kuljum. Hekk jiddominaw is-saħħa u l-mard, it-tama u l-qtigħ il-qalb, il-vendetta u l-maħfra, il-ġustizzja u l-inġustizzja jew il-liġi tal-ġungla, il-miżerja u l-kumdità, it-tbatija u l-lussu, il-faqar u l-ġid materjali, ir-regħba u l-ġenerożità, il-gideb u l-verità, kif ukoll il-ferħ u n-niket, fost oħrajn.
Naraw ukoll kif bil-perseveranza persuna tista’ tasal tagħmel dak li fil-ħajja ta’ kuljum jaf jidher (jew tabilħaqq ikun) diffiċli, jekk mhux impossibbli wkoll. Bl-istil karatteristiku tiegħu Said-Zammit iħalli f’idejn il-qarrej biex jiskopri sa fejn il-perseveranza u s-sagrifiċċji kollha tal-protagonista prinċipali ta’ dan ir-rumanz jirnexxilhom iwassluh.
