Description
Il-ħrejjef jeħduna fl-art tal-maġija u l-fantasija. Madwar id-dinja, il-ħrejjef u l-leġġendi għandhom elementi komuni: annimali u tjur jitkellmu, palazzi, xjuħ għorrief, festi, slaten twajba jew kefrin, prinċipessi sbieħ maħtufin mill-briganti, u anki episodji vjolenti.
Din il-ġabra, b’addattamenti ta’ Mario Azzopardi, tirrakkonta b’mod vivaċi stejjer u leġġendi minn madwar il-pjaneta għall-gost ta’ qarrejja tfal u adoloxxenti.
Minbarra firxa ġmielha fuq tmien pajjiżi Ewropej, inkluża Malta, il-ġabra teħodna wkoll f’kontinenti u pajjiżi mbiegħda bħaċ-Cina, il-Mongolja, l-Indja, Kuba, Papwa u l-Ekwador, u saħansitra adattamenti ħielsa mill-Bibbja u Hans Christian Andersen.
Bosta minn dawn il-ħrejjef huma miżgħuda b’għerf moħbi li hu komuni u differenti fl-istess ħin, u li nistgħu nqisuh bħala l-għerf kollettiv tal-umanità. Dan għaliex simbolikament il-ħrafa tirrappreżenta l-ħajja tal-bniedem.
