Description
Minn mindu deher għall-ewwel darba fl-1980, L-Istramb inqaleb f’diversi lingwi – Ingliż, Franċiż, Sloven u Maċedonjan – u ġie ppubblikat f’Renfrewshire, Pariġi, Ljubljana, u Belgrad.
Huwa rumanz qawwi u konċiż, miktub b’nifs maħrub li jesprimi l-burdati differenti li jgħaddi minnhom żagħżugħ fi kriżi ta’ identità li qiegħed ifittex lil Alla, lid-dinja ta’ madwaru u lilu nnifsu. Huwa rakkont li fih jistgħu jingħarfu bosta żgħażagħ oħrajn li bħal Baruk, il-karattru ewlieni, jistennew mill-istituzzjonijiet u mill-ambjent it-tweġibiet li jibqgħu ma jaslulhomx. Mid-dar sas-Seminarju, mit-toroq imwarrbin sal-kamra magħluqa tiegħu, Baruk jagħmel vjaġġ mimli intensità.
Oliver Friggieri, awtur internazzjonali li l-kotba u l-istudji tiegħu ġew ippubblikati f’ħafna bliet barranin u li diversi xogħolijiet tiegħu nqallbu f’bosta lingwi, hawnhekk jikkonċentra fuq l-għeluq ta’ gżira biex fiha jsib ukoll il-bniedem li jixtieq l-arja tal-bieraħ bla qies.
