Description
Fil-pjazza jinġemgħu ħafna karattri interessanti, Maltin u barranin ta’ kull età. Nies bħalek u bħali, oħrajn bil-wisq iktar ikkuluriti u, Alla jbierek, kulħadd għandu xi ħaġa x’jgħid. U bħal fiċ-ċirklu ssib ukoll min idaħħak. Tiltaqa’ ma’ nies serji u anki ma’ min mhux. Mas-serji ngħoddu lis-Sur Alfred Debono, Direttur ta’ Dipartiment, li jirrakkonta l-ewwel esperjenza ta’ mħabba f’terran f’Buġibba. Inqas serju, ikollna nammettu, hu Ċensu, l-‘espert tal-edukazzjoni sesswali’. Hemm Paddy, l-Irlandiż li nkaram wara Burmarrad, u Tony li ġie lura mill-Awstralja biex jiżżewweġ. Issib lil Sammy, ir-re talpizza; lil Vicky, li kellha x-xorti li tiltaqa’ mat-tenur Joseph Calleja fi New York; lil Wenzu, li tilef għaqlu wara l-bettieħ ta’ Janice, u bosta oħrajn li lkoll għaddew minn sitwazzjonijiet interessanti.
