Sammy Meilaq twieled Bormla fid-9 ta’ April 1949. Attenda l-iskola primarja ta’ Bormla mnejn għadda għall-edukazzjoni sekondarja fil-Liċeo u ta’ 14-il sena temm b’suċċess il-Form Five. Meta kellu 16-il sena daħal fuq il-bank tax-xogħol fit-Tarzna ta’ Malta bħala apprendista fis-sengħa ta’ shipwright. Kien hawn fejn l-għaqda ta’ bejn il-ħaddiema ġabitu wiċċ imb wiċċ mat-trejdunjoniżmu u mill-ewwel issieħeb fil-General Workers Union. Meta t-tmexxija tat-Tarzna għaddiet għal għand il-ħaddiema, Sammy Meilaq ikkontesta u ġie elett regolarment fil-Kunsill tat-Tmexxija bejn l-1975 u l-1997. Għal tnax-il sena sħaħ, mill-1985 sal-1997, huwa kien iċ-Ċhairman tat-Tarzna fl-istess waqt li baqa’ fix-xogħol tiegħu ta’ shipwright u jinżel jaħdem fil-baċiri. Fil-ħajja politika tiegħu, Sammy kien attiv fi ħdan il-Partit Laburista. Huwa kien elett fl-Eżekuttiv Nazzjonali tal-Malta Labour Party mill-1985 sal-1997. Huwa serva wkoll fil-Bord tal-Viġilanza u Dixxiplina tal-Partit mill-1988 sal-1992.
Fis-sena 2006 huwa nħatar President tat-Taqsima Metall u Kostruzzjoni tal-GWU u baqa’ f’din il-kariga sal-2010 meta laħaq l-età tal-irtirar mix-xogħol mit-Tarzna. Illum huwa President Onorarju tal-istess taqsima.
Sammy huwa awtur ta’ diversi essays u artikli ta’ xeħta politika u trejdunjonistika li ġew ippubblikati u mxandra mill-media lokali.
Sammy huwa magħruf sewwa bħala segwaċi ferventi u ħabib mill-qrib tal-eks-Mexxej Laburista, il-Perit Dom Mintoff.
Sammy Meilaq huwa miżżewweġ lil Elizabeth neè Camilleri u għandhom żewġt itfal, Lara u Samuel.
