Description
Is-Sejħa mix-Xagħri hu rumanz mibni fuq l-imħabba u xejn anqas fuq l-avventura. Fih issib il-patrijottiżmu, il-ħolm, il-kilba għall-flus, il-qerq u fuq kollox l-imħabba tbaqbaq u tħeġġeġ fi qlub iż-żgħażagħ.
Għalkemm il-ġrajja fiha n-nifisha mhix storika, l-isfond tagħha hu. Żewġ arkeoloħisti, wieħed Ingliż u l-ieħor Ġermaniż imorru jħaffru biex isibu fdal ta’ tempju Eġizzjan. Dawn it-tnejn kienu qishom kelb u qattus, mhux biss il-missirijiet kienu kontra xulxin iżda wkoll uliedhom, ix-xebbiet Eliża u Hilda. Dawn saru rivali għall-imħabba tal-kaptan Ingliż.
Kemal, bin il-patrijott u mexxej tal-poplu, wkoll jixħet għajnejh fuq Eliża. Min miż-żewġ xebbiet jasal li jirbaħ l-imħabba tal-kaptan?
Il-professur Ġermaniż jiksibha l-vana glorja li tant stinka għaliha? X’sar minnu missier Kemal meta ta’ l-ewwel qam kontra l-madmad tal-ħakkiem barrani?
L-avventura minsuġa ma’ waqtiet fejn l-imħabba tixgħel u tnissi d-dwejjaq tal-ħajja u kull xorta ta’ taqtiegħ il-qalb. Dan kollu ma jħallikx ma tissuktax taqra l-ġrajja sa ma tasal sat-tmiem.
Miktub b’Malti mirqum u kull fejn kien hemm il-ħtieġa ta’ tifsir dan ma naqasx li sar.
Rumanz interessanti li tieħu pjaċir taqrah.