Description
Il-Moħħ fl-ilsien jeħodna fuq vjaġġ li jibda minn qabel De Soldanis u jasal sal-Internet biex jurina kif ħaddmu l-Malti ta’ qabilna (u allura jittratta l-istil fil-Malti għal skopijiet partikulari) u x’qegħdin naħsbu aħna fuq ilsienna (jiġifieri, jiddiskuti xi ideat ta’ żmienna).
Kif sab il-lingwa biex jaqleb il-Bibbja mill-oriġinal Mons. Pietru Pawl Saydon? X’fittex li jagħmel bil-ġurnaliżmu narrattiv tiegħu Herbert Ganado? Kif ħoloq il-lingwa San Ġorġ Preca biex jibni għaqda soda reliġjuża? X’elementi uża fil-lingwa medika bil-Malti Sir Temi Zammit? Kif żewweġ l-elementi tan-novella mal-poeżija l-Poeta Nazzjonali? Dawn huma ftit mill-ħafna mistoqsijiet li tittratta l-ewwel part ta’ dan il-ktieb li trid turi kif il-ħsieb isir lingwa f’sitwazzjonijiet partikulari.
Imbagħad wara li jara x’inkiseb permezz tal-awturi ewlenin, il-ktieb idur biex jistaqsi mistoqsijiet marbutin mal-preżent. X’nifhmu b’Malti tajjeb illum? Jeżisti l-Malti safi? Hemm sessiżmu f’ilsienna? Kif nistgħu nispjegawha l-lingwa tat-tfal? X’effett qed ikollu l-Internet fuq il-Malti? Dawn il-mistoqsijiet u oħrajn isawru u jħawru t-tieni parti tal-ktieb li trid tibqa’ turi kif il-ħsieb għadu jsir lingwa.
Il-Professur Charles Briffa jgħallem it-traduzzjoni u l-letteratura Maltija fl-Università ta’ Malta.
