Description
Twelid … tfulija … imħabba … skola … xogħol … tradiment … vjaġġi … mewt … dak kollu li ngħixu tul ħajjitna, twila jew qasira: Bħal f’Dizzjunarju jdaħħalna fir-rakkont ta’ ħajjet Anġlu Debono, hekk kif għexha skont xewqatu… bil-ħlewwiet u bl-imrar tagħha … bil-hena u t-thewdin li jitgerbu fiha …
Miegħu, ngħixu kważi ħamsin sena minn dak li ġara f’Malta sal-lum. Nagħmlu dan mhux bl-arloġġ. Nagħmluh hekk kif kull episodju minn ħajtu jitpoġġa quddiemna skont il-kelma li biha għadu jitqanqal fil-memorja.
Dan hu l-ewwel rumanz bil-Malti li tista’ tbidieh u tkomplih minn fejn trid, taqra minn fejn taqra, mill-bidu jew min-nofs jew mit-tmiem u tispiċċah kif trid, bħal f’dizzjunarju.
